Ka Mobile Ruh Ka Daw Jong Ka Jingsniew Ba Shyrkhei, Lah Ban Ngat Ha Ka Aiñ POCSO

Ha kane ka sngi ka 15-11-2025 ka Shnong Umroi Umdohbyrthih ka la ïoh ïa ka Awareness Programme halor ka phang ban ïada ïa ki khynnah rit khamtam ïa ki khun kynthei (Awareness Programme on Child Protection) ba la wan ban pynlong da ka FXB India Suraksha ba la lamkhmat da i Ms Daphilin Laloo (Social Worker) bad i Ms Phibalahun Suting iba long ruh i District Coordinator jong ka FXB India Suraksha. Ha kane ka sngi la ïa donlang i Mr Pynwanbor Sylliang, Rangbah Shnong, Mr. TB Sun, Secretary Shnong bad kumjuh ruh baroh ki dkhot jong ka Executive Committee jong ka Shnong Umdohbyrthih.

1. Wat Ktah Ïa Ki Jaka Bym Dei Ban Ktah...

Ha kane ka sngi i kongsan i dei i Ms. Susana Ryngksai iba dei i Sub-Inspector na Umiam Police Station iba la batai bniah halor ka jingkordor jong ka jingim briew naduh ki khun kiba rit haduh kiba la san. Bad ruh ban shim ba ka akor burom kum ka stieh ïada jong ka jingim babha.

1. Ki kmie ki kpa kim dei ban ai mobile palat ïa ki khun ki kti.
2. Kim dei ruh ban hikai ban ktah sha ki jaka bym dei lane ki bynta bym dei jong ki dkhot met.
3. Kim dei eh ruh ban hikai ban doh ïa kiwei nuksa kum ki bahaïing hasem. Namar kane kan sa don ka jingkatah ha kiwei pat de ki bynta jong ka jingim briew. Namar kane kam dei shuh ka juk barim, kumta donkam ban da husiar.

2. Ym Bit Ban Ïalang Samla hapoh ka 18 Snem Ka Ryta

La mana ba ki khynnah samla kim dei ban ïalang samla bad ban ieid samla hapoh ka 18 snem ka ryta. Lada leh pyrshah ïa kata yn lah ban ngat ha ka POCSO Act lane ka Protection of Children from Sexual Offences Act, 2012.

3. Haba Ki Pep Skul (Absent)

Donkam ban kylli bniah bad ban tip ïa ka daw. Namar kane ruh kan sa ïalam bakla lada shu ngeit tang ïa ka jingong jong ki khun.

4. Lada Ki Ong Ba Pang Haba Leit Pynjhieh

Wat shu hun tang ban ïohsngew, hynrei dei ban da kylli bad ïasyllok bad ki khun ki kti khnang ban tip ïa ka daw tynrai ïoh lehse ka don ka jingbakla ha ka jingïadei badno re badno.

5. Haba Shongkha Hapoh 18 Snem Ka Ryta

Kane kan ngat ha ka POCSO Act. Bad lada ong ba baroh arliang kur ki ïa mynjur lang ruh kan sa hap pat de ha ka Child Marriage Act. Na kata ka daw dei ban da husiar. Ai ka hok  ïa ki khynnah kynthei ba kin pule bad ban kiew ha ki liang baroh bad kane kan ïada ïa ka shongkha khynnah namar ka jingstad bad ka jingshemphang ka wan lyngba jong ka jingpule puthi.

Lada don mano mano ki para marjan jong phi kiba ngat ha ka kam shongkha hapoh ka 18 snem ka ryta, dei ban pyntip sha ki pulit ba kin ïasyllok bad ki ba ban leh ïa kaba donkam.

6. Long Ne Em Ban Buhrieh?
Lada phi buhrieh phi ruh phin sa shah ngat lang ha ka Aiñ ba dei peit.

7. Ka Jingshimsmai (Pledge)
Ka don ruh ka jingshimsmai pledge ha ka ktien phareng ba la ïalam da i Mr TB Sun, Secretary Shnong kum shi bynta ban shim ïa ka jingkitkhlieh ban long ki nongshong shnong kiba lah ban tei ïa ka imlang-sahlang bad ka shnong ka thaw hi baroh kawei da ki kam kiba bha.